Seddori. Reconnoscimentu de “Sagra di qualità” po sa Festa de su Civraxu
Noba pigada de "La Gazzetta del Medio Campidano".
Sa Festa de su Civraxu est ufitzialmenti “Sagra di qualità”. Su reconnoscimentu prestigiosu dd'ant assignau su 11 de martzu passau a sa Pro Loco de Seddori, rapresentada de sa Presidenti Lauranna Fenu, in sa tzirimónia de cunsigna ufitziali chi ant fatu in Palatzu Madama. “ Una dí istravanada innui su Presidenti de su “Unpli” natzionali, Antonio La Spina, cun is presidentis regionalis “Unpli” ant reconnotu e postu in luxi su trabballu chi ant fatu is Pro Loco e totus is voluntàrius chi cun custas collabborant – ispricat sa Presidenti de sa Pro Loco de Seddori, Lauranna Fenu – Sa Pro Loco nosta s'est sémpiri impinniada po s'amparu de su territóriu e de su patrimóniu materiali e immateriali, reconnoscendi s'importu de s'istória nosta. Unu reconnoscimentu chi recumpensat sa Pro Loco e totus is sótzius. Unu ringratziamentu particulari andat a totus is assótzius localis e non chi collabborant po sa rennescida de totus is manifestatzionis e no isceti po sa Festa de su Civraxu”.
Sa Festa de su Civraxu est lómpia su Cabudanni passau a sa de 5 editzionis e si fait dónnia annu, in cuntemporànea cun sa “Festa del Borgo”, s'úrtimu domínigu de su mesi de Cabudanni cun sa punna de avalorai su pani famau de Seddori . Funt 47 is Pro Loco italianas chi in custa ocasioni ant retziu s'atestau de su màrchiu de “Sagra di qualità” po festas diferentis ispartzinadas in totu s'Itàlia, in Sardigna ant premiau 8 Pro Loco. In prus de Seddori, su màrchiu de calidadi dd'ant assignau a: Orthullè po sa Festa de su casizolu e de sa craba; a Baunei po sa Festa de su proceddeddu; a Talana po sa Festa de su pressutu; Foghesu po su papai de is centenàrius; Arborea po sa Festa de sa pulenta; Ossi po sa Festa de su tzitzigorru e Bidda Matzràxia po sa Festa de s'olia. “Est istètiu un'acontéssiu bellu meda – narat Giampaolo Manca, Ispetori natzionali po is festas de calidadi – Ocannu sa manifestatzioni est puru melliorada rispetu a is editzionis pretzedentis. Sa primu dí, su 10 de Martzu, nc'est istétia sa premiatzioni in su “Hotel Ergife” cun Adriana Volpe e Beppe Convertini. In su palcu funt artziaus totus is rapresentantis de is Pro Loco premiadas e sa Sardigna est istétia sa regioni chi at tentu prus reconnoscimentus. Dónnia Pro Locu at portau su prodotu típicu suu. Sa de duas dís nc'est istétia sa tzirimónia in sa Sala Koch de su Senau de sa Repúbblica e ant donau is targas, in su matessi momentu ant fatu biri unu “mix” de filmaus de totus is biddas premiadas”. In custa ocasioni, in prus, ant presentau una lei noba, ancora in trabballadura, po regulamentai sa chistioni de is pianus de seguresa netzessàrius po is acontéssius púbblicus, po ndi fatzilitai s'iscritura e sa fruitzioni de parti de is Pro Loco.
Pùblicada su 15/04/2024
Titolo
Testo articolo in italiano
Pubblicato il 15/04/2024