Biddacidru – Pramanteddu – Casteddu. Torrat in Sardigna Franco Arminio, su poeta e paesòlogu. 22 de Martzu 2024.

Noba e fotografia pigada de su giassu: sangavinomonreale.net In ocasioni de is dexi annus de su “Club” de “Jane Austen Sardegna” e is anteprimas de sa de 9 editzionis de su “Festival Dicembre Letterario” chi organizat su “club” etotu, tres acontéssius in Biddacidru, Pramantellu e Casteddu.

Una torrada, sa de Franco Arminio in Sardigna, in ocasioni de is dexi annus de su Club de Jane Austen. In su matessi momentu chi arribbat su beranu, su “club” at organizau un’acabbu de cida arricu de acontéssius e afestus. Tres atóbius chi istràngiant, a parti unus cantu amigus e amigas de su “club”, s’autori chi narrat “Canti della gratitudine” s’arregorta noba de poesias chi Bompiani at imprentau. A custas pàginas s’autori intregat su frutu de annus de ascurtu de issu etotu e de su mundu, sa summa de su chi at imparau in su camminu suu peri tzitadis e biddas: su fueddu poéticu ispartzinat sa fortza mudadora sua, de esperiéntzia intima si fait comunitària e domandat a nosu de dda nai cumenti a isfida a s’indiferéntzia, cumenti a forma de resisténtzia, cumenti su prus salvíficu de is cuntàgius.

Is acontéssius organizaus funt totus a indonu; po cenàbara 22 in Biddacidru e domínigu 24 in Casteddu est giai totu prenotau, cun una lista de abetu ativa. Totus is piessignus a sighiri.

Cenàbara 22 de Martzu, h. 18:00, in su Molinu Cadoni in Biddacidru: “Buon compleanno Club de Jane Austen”.

Un’atóbiu emotzionanti, innui si arremmonant is dexi annus de atividadi de su “Club” imparis a is chi ndi ant fatu s’istória.

Intervenint:

Vanessa Roggeri, Iscritora

Luca Manunza, Presidenti de s’assótziu “Perda Sonora” e de su “festival” literàriu “Cabudanne de sos Poetas”,

Giuditta Sireus, diretora artística e ideadora de su “Club Jane Austen Sardegna”,

Cordinat sa giornalista Simonetta Selloni

a sighiri

Franco Arminio presentat “Canti della gratitudine”, ed. Bompiani.

Est totu prenotau ma ddoi at una lista de abetu ativa in s'acàpiu:

Eventbrite: https://www.eventbrite.it/.../biglietti-buon-compleanno...

Su logu: in su Molinu Cadoni, un’istrutura istórica restaurada chi donat a su Lavatoju.

Su logu mannu e eciseri ammostat decorus elegantis chi si cuncordant beni cun elementus istruturalis traditzionalis. Un’iscenàriu perfetu po acontéssius culturalis e formativus, musicalis e teatralis chi agatant logu siat a intru chi in sa pratza imperdada o in sa lolla.

Sàbudu 23 de Martzu, h. 15:00, in “Il Giardino di Lu” in Pramanteddu: “Il giardino della Poesia”

Franco Arminio presentat “Canti della gratitudine”, ed. Bompiani.

Un’acàpiu intra de letura, ànimas, froris, fueddus, emotzionis, umanidadi.

Sa poesia vibbranti de Franco Arminio cun “Canti della gratitudine” in unu campu de tulipanus chi proponit unu progetu ancoras prus mannu de informatzioni, formatzioni, istúdiu e circa asuba de su tumori a is ovajas: “Il Giardino di Lu”.

S’acontéssiu si fait in collabboratzioni cun sa libbreria “Mondadori Bookstore”.

Si podit intrai chentza de si prenotai.

Su logu: unu giardinu froriu istravanau cun un’istória ispetziali.

“Il Giardinu de Lu” in memòria de sa filla Luana, chi est morta po nexi de unu tumori a is ovajas a 37 annus. In pagu tempus mudat unu percursu personali in una grandu isfida, interessendi una comunidadi de voluntàrius e donadoris sémpiri in créscita chi, atiraus de s’dea sua e de sa bellesa de su Giardinu, cumpartzint e agiudant s’iscopu suu.

Domínigu 24 de Martzu, h. 18:00, in sa “Fondazione Siotto”, in Casteddu: Franco Arminio presentat “I Canti della gratitudine” Un’ocasioni po arrexonai imparis a s’autori a suba de un’atzioni simpli e pretziosa: umperai beni is fueddus. Is fueddus chi naraus, iscrieus, ligeus dónnia dí funt unu biaxi ma, meda, tropu bortas, truessant sa vida nosta chentza de lassai arrastu.

Est totu prenotau ma ddoi at una lista de abetu ativa in s’acàpiu:

Eventbrite: https://www.eventbrite.it/.../biglietti-franco-arminio...

Su logu: su palàtziu Siotto est una domu istórica de s’Otuxentus perfeta po organizai atóbius, ammostas, cursus, cunvénnius, cuntzertus e atividadis teatralis.

Is propostas faint parti de is afestus po is dexi annus de su “Club Jane Austen” – anteprimas de sa de 9 editzionis de su “ Festival Dicembre Letterario”, finantziau de sa “Fondazione di Sardegna” e funt fatas in collabboratzioni cun su “ Festival Cabudanne de sos Poetas”, su Sistema Bibliotecàriu Monti Linas, “Il Giardino de Lu”, sa “Fondazione Siotto” e sa libreria “Mondadori bookstore” e sa libreria “Paese d'Ombre”.