Biddacidru. Festa de Santu Isidoru: iscritzionis po tracas e cuaddus.
Noba pigada de sangavinomonreale.net
Sa Festa de Santu Isidoru in Biddacidru pigat vida, gràtzias a s'annoamentu de su Comitau e a is circas fatas in is archívius parrochialis de sa Crésia de Sant'Antoni e de Santa Barbara. Una de is novidadis de su 19 de Maju 2024, in ocasioni de sa prutzessioni de Santu Isidoru, est chi nci torrant a ponni in sa Crésia de Sant'Antoni s'istàtua de su Santu restaurada de unu totu.
Sa Festa de Santu Isidoru, protetori de messajus e sartus , tenit un'istória de prus de cent'annus: in su 1903 unus cantu cirdesus iant comporau un'istàtua de su santu e iant detzídiu de ndi tzelebrai sa festa. S'istàtua est istétia, annus meda càusa de certus intra de sa parróchia de Santa Barbara e de Sant'Antoni: iscéti in su 1908 su chi intzaras fiat Arciobispu de Casteddu Muns. Balestra, iat ordinau de collocai una borta po totus s'istàtua in sa Crésia de Sant'Antoni, innui iant pesau un'altari in màrmuri in onori de su Santu.
In su 2024 sa traditzioni presentat unas cantu novidadis. Sa bia Olbia est su coru de sa festa, chi inghitzat cenàbara 17 de Maju 2024 cun una prutzessioni chi portat su Santu de sa crésia fintzas a bia Olbia, innui ddoi at una capella provisória. Sàbudu 18 de Maju 2024 si fait sa missa in sa capella de bia Olbia e pigat vida sa primu editzioni de una fiera agrícola chi punnat a avalorai su trabballu de is produtoris cirdesus.
Domínigu 19 de Maju 2024 si fait sa primu Missa cun su cumbidu, intamis a merí si tzèlebrat sa liturgia de sa Paràula e a sighiri sa prutzessioni cun is tracas traditzionalis e is cuaddus, po nci torrai su Santu de bia Olbia a sa parróchia de Sant'Antoni.
"Seus prexaus – iscrint is organizadoris de sa Festa de Santu Isidoru – de fai isciri chi funt abertas is iscritzionis po tracas e cuaddus po sa prutzessioni de Santu Isidoru, domínigu 19 de Maju 2024.
Is mollus cumpilaus tocat a ddus mandai aintru de su 12 de Maju 2024 a is indiritzus "e-mail" chi sighint: email: santisidorotraccas@gmail.com o santantoniovillacidro@gmail.com“.
Acàpius útilis po chini est interessau a partitzipai. Regulamentu Tracas:
https://drive.google.com/file/d/1uxkeCm1TZy4PU8U9m6_ceapsZ5cOPZ7E/view?usp=sharing
Mollu Tracas:
https://drive.google.com/file/d/15NBJDfvj-MoibGmnJYLW1agBvP8pYu7R/view?usp=sharing
Pùblicada su 18/04/2024
Titolo
Testo articolo in italiano
Pubblicato il 18/04/2024