25/04/2024

Sàrdara. Su Nuraxi de Ortu Comidu

Sàrdara. Su Nuraxi de Ortu Comidu

Noba pigada de sa pàgina Facebook de su Museu Villa Abbas.

Minudantzias de su patrimòniu.

Su Nuraxi de Ortu Comidu e sa bidda cosa sua si agatant in su sartu de Sàrdara. A testimòngiai sa presèntzia insoru funt is arrastus chi ant lassau de edadi nuràgica, pùnica e romana.

In cussu giassu ant fatu duus istuvonadas de importu: sa primu dd’at fata in su 1913 (millinoicentutrexi) s’archeòlogu Antonio Taramelli, sa segunda dd’at fata s’archeòloga Miriam Balmuth in is annus ’70 (setanta).

Su Nuraxi Ortu Comidu tenit una planimetria cumplessa.

Teniati: unu corratzu cun su putzu e assumancu tres turris unidas de una cortina murària. In su tzentru nci fiat una turri cun su diàmetru de 12 (doxi) metrus chi si podit fai apillai a su Brunzu de Mesu, in su XV sec. a.C.

Su chi is’istudiosus ant agatau est arreguau in su Museu Archeològicu Villa Abbas e is arrastus si contant chi cussu giassu dd’iant abbitau po tempus meda. Po su chi pertocat s’edadi pùnica is istudiosus ant agatau arrogus de ceràmica grussera cun incàscius “a ditate”, chi formant sa buca de unu forru cumenti cussus chi ddoi at fintzas in su Nord de s’Africa in dì de oi.

Pùblicada su 25/04/2024