18/07/2024

Santu ‘Èngiu. In su “Festival Letterario del Monreale” cras Daria Bignardi, Nicola Dessì, Adriano Corona e Beniamino Zuncheddu.

Santu 'Èngiu. In su “Festival Letterario del Monreale” cras Daria Bignardi, Nicola Dessì, Adriano Corona e Beniamino Zuncheddu.

Noba pigada de su giassu: www.ilsardingtonpost.it

Cras 18 de Argiolas 2024, sa primu dí de sa de 6 Editzionis de su “ Festival Letterario del Monreale” (Festival Literàriu de su Murriali) cun Daria Bignardi, Nicola Dessì, Adriano Corona e s'atóbiu dedicau a su líbburu “Io sono innocente” (De Agostini) de Mauro Trogu e Beniamino Zuncheddu.

S'abertura ufitziali de s'editzioni 2024 de su “Festival Letterario del Monreale” (Festival de su Murriali) cras, 18 de Argiolas 2024, h. 19:00 in Domu Mereu cun sa presentada de su sàgiu “La Sardegna in Età Punica (Condaghes), innui s’archeólogu Nicola Dessì, torrat a percurri sa preséntzia de is Púnicus in Sardigna, chi iant fundau tzitadis che a Karaly, Sulky, Tharros, Nora, Bithia e medas àteras. Fueddant cun s’autori Francesca e Carlotta Spanu.

- h. 19:45 (otu mancu cuartue a merí), Adriano Corona presentat su romanzu “Stiamo vicini che qui non si tocca” (Amicolibro) – un’istória de amigàntzias, raportus intra de fillus e babbus e mammas e de un’amori nueddu, chi bolit isceti sa possibbilidadi de si cumpriri – ndi fueddat cun Carmen Salis e Leonardo Uda.

- h. 20:45 (noioras mancu cuartu de a noti), Daria Bignardi presentat su líbburu cosa sua “ Ogni prigione è un’isola” (Mondadori), in custu líbburu s’autora contat su biaxi suu in s’isulamentu e in is presonis, interioris puru, partendi de issa, ponendu·si in giogu, diaici cumenti at fatu su mengianu de su 9 de Martzu 2020 in unu vídeu girau in antis de su presoni de San Vittore, in s’interis chi unus cantu cartzeraus artziant a crabetura aunendi·sí a is rebbellias chi fiant esplodendi in medas presonis italianas. In fatu a cussus acontéssius fiant mortas 13 personas cartzeradas. Daria Bignardi ndi fueddat cun Giovanni Follesa e Francesca Spanu.

- h. 22:30 (dexi e mesu de a noti), logu a s’atóbiu dedicau a su líbburu “Io sono innocente” (De Agostini) de Mauro Trogu e Beniamino Zuncheddu, su contu a duas boxis de una de faddinas giudiziàrias prus gravis de sa giustítzia in Itàlia. Un’istória de siléntzius e tempus firmu, e in su matessi momentu de circa e de lota chena de pàsiu. In prus de is autoris intervenint Irene Testa (Garanti Regionali de is cartzeraus) e is abogadas Rossana Palmas e Francesca Spanu. Mòderat Andrea Pau.

ORGANIZATZIONI

S’acontéssiu dd’at organizau su Comunu de Santu ‘Èngiu in collabboratzioni cun s’assótziu “Festival Letterario del Monreale”, su Sistema Bibbliotecàriu Monti Linas, cun s’agiudu de sa Regione Autònoma de Sardigna, de s’Assessorau de s’Istrutzioni Púbblica, Benis Culturalis, Informatzioni, Ispetàculu e Isport e de sa “Fondazione di Sardegna” cun su cordinamentu organizativu de sa “Associazione Enti Locali per le Attività Culturali e di Spettacolo”.

Po totu sa durada de su Festival est presenti sa libbreria “Edumondo” de Casteddu cun sa postatzioni de béndita de líbburus.

Pùblicada su 18/07/2024