Biddanoa de Forru. Rapresentatzioni teatrali a indonu “Brullas de Stanghera”.

Comunu de Biddanoa de Forru. In su cuntestu de sa "Festa dell'Emigrato", martis 13 de Austu 2024, h. 22:00 in pratza Costituzione, in Biddanoa de Forru ddoi est sa rapresentazioni teatrali in Língua Sarda "Brullas de Stanghera".
Po biri sa cummédia non si pagat su billetu, ca est una de is atividadis culturalis in Língua Sarda de su progetu Terras de Marmilla, Linas e Campidanu finantziau cun su dinai de sa Regione Autònoma de Sardigna cunforma a sa L.482/99 e a sa L.R. 22/2018.
S'acontéssiu dd' at organizau s'Ufítziu de Língua Sarda paris cun su Comunu de Biddanoa de Forru e s'assótziu Pro Loco.
Sa cummédia chi portat in iscena sa cumpangia teatrali Sa Làntia de Rio Murtas, a incuru de Giuliana Zurru e cun sa Regia de Guido Cadoni, fueddat de sa stanghera chi in bidda sua s'ispàssiat a contai contus chi inventat e a fai brullas. A bortas cracat sa manu, difatis no est una brulla lèbia sa chi organizat a dannu de Remigio Garau.
A sa mulleri de Remigio ddi contant de sa morti de su pobiddu, acontéssia a sa bessida de su tzilleri. In aparéntzia Maria non ndi podit sanai de su dolori ma custu ddi passat luegus a sa bidea de incasciai s'asseguratzioni asuba de sa morti de su pobiddu ma sa furriada de su pobiddu imbriagu a domu fait pigai a sa cumédia una diretzioni chi nisciunu si abetat.
Non ammancat s'organizatzioni de un'interru particulari chi donat vida a un'àteru corpu de scena chi serrat sa cumédia.
Sa cumédia giai rapresentada in àteras biddas at tentu unu grandu acunsentimentu de púbblicu.
Seis totus cumbidaus a partitzipai.

Pùblicada su 03/08/2024