02/09/2024

Biddacidru. S’Amministratzioni Comunali isménguat sa TARI de su 3%.

Biddacidru. S’Amministratzioni Comunali isménguat sa TARI de su 3%.

Noba pigada de su giassu: www.lagazzettadelmediocampidano.it Sa TARI, sa tassa a suba de s'àliga tanti odiada, no aumentat antzis in Biddacidru isménguat de su 3%. Ddu ponit in luxi su Síndigu, Federico Sollai: “Cun grandu satisfatzioni e orgólliu, fadeus isciri chi su Contzillu Comunali at aprovau is tarifas TARI po su 2024. A su cuntràriu de s'andatzu natzionali chi previdit aumentus, in calincunu casu fintzas a su 22%, is tarifas de Biddacidru ismenguant in media de prus de su 3% cunfrontas a ocannu passau. Su fatu de no ai aumentau ma antzis de dd’ai ismenguada est istétiu possíbbilis gràtzias a una cuntratatzioni cun su Cunsórtziu Industriali, chi at permítiu de torrai a difiniri su ristoru ambientali e calmierai is aumentus prevídius. In prus, un'atzioni importanti de cuntrastu a s'evasioni de su 2018 a su 2021 at cuntribbuiu a custu fatu, garantendi sa giustesa fiscali e cuntrastendi is impitus pantàsimas”.

S'Amministratzioni Comunali at destinau 32 milla éurus a is famíllias e 8 milla a is impresas in dificultadi chi perou depint èssiri in régula cun is pagamentus pretzedentis, premiendi chi at sémpiri pagau mancai is probblemas. “Po is annus chi benint – acabbat su Primu Tzitadinu -sigheus a melliorai su servítziu fadendi s'ecotzentru, po aumentai sa regorta diferentziada e apoderai bàscias is tarifas. Custu resurtau reflessat s'impénniu cosa nosta faci a is famíllias, is impresas e, pruschetotu, a is fàscias de populatzioni prus débbilis.

Pùblicada su 02/09/2024