Seddori. Una terratza cun vista in su Campidanu.

Noba pigada de s’ Unioni Sarda. Su Comunu at donau su permissu a su “Miraderi de su Cunventu de is Capucinus: osservatóriu in su Campidanu”: - “Est unu progetu agudissiosu – spricat su Síndigu de Seddori Alberto Urpi - chi addia de acolliri is pellegrinus de su Caminu Francescanu in Sardigna, donat sa possibbilidadi de torrai a ammellorai unu giassu chi est patrimóniu de totu su cumplessu urbanísticu, de sèmpiri giassu afetzionau de viagiadoris e ammantiosus de vistas ispantosas”. Est su segundu interventu, in su tempus, bófiu de s’amministratzioni comunali, postu aintru de unu programma prus mannu chi impignat risorsas fintzas a éurus 700 milla, po sa majoria fundus de sa Regioni. Sa pratza in seguresa. Prima cosa est ponni in seguresa sa pratza ananti a su cunventu, ca dda funt abettendi de 20 annus, poita ddoi est una cedida de su paimentu, su sciorrocu de is murus, s’ intrada arrocada, traessas. Fintzas interventus po aderetzai àteras cosas. “Cun sa segunda parti de dinai – arregordada Urpi – si podint arresolvi problemas medas. Su terraprenu, cun in mesu sa statua de Santu Nigola, at a essi torrau a apamentai, imbelletau e impretziosiu cun murus de perda, aperturas e barandíglias cun ferru antigau, birdi meda, lantionis novus, banchinas e cadinus po s’àliga. Sa novidadi at a essi cussa de pònniri unu cannocchiali po castiai sa citadi, su Campidanu, fintzas a is casteddus de Sàrdara e Silícua”. Centru Polifuntzionali Su progetu est de is tecnicus de s’enti: est una solutzioni chi at a fai arresparmiai e chi permitit de fai àterus trabballus, cumenti arrangiai sa pesada po arribbai in su cunventu, arrangiai su muru a làcana de sa strada e segai is matas chi funt acanta de nci arrui. “Po acabbai – aciungit su síndigu – si at a arrangiai sa scabera in Bia Sant’ Antiogu, sa segunda intrada po su cunventu. A sa fini, trabballus puru, po sa cresiedda de Santu Arrocu, serrada de tempus meda po su cultu, at a diventai unu centru polifuntzionali, a mesu strada intra de su casteddu e su Museu de is Capucinus chi est contivizau de su Comunu”. Caminu de fidi “Su Caminu Francescanu nou – contat s’ Assessori a su Turismu, Fabrizio Collu – nàsciu s’annu passau gràtzias a sa Regioni previdit una tapa in Seddori, in su Cunventu. Gràtizas a sa posidura sua, est unu giassu intra de is prus interessantis e de importu de su territóriu, logu chi atrait, únicu de sa genia sua: ddu podemus nomenai corridóriu de sa citadi, cun una vista bella e impari logu religiosu, tanti de essi postu in su caminu turisticu de sa bidda”. Sa presidenti de su Consillu Comunali, Roberta Casta, arregordada: “Su progetu, aprovau de totu du Consillu Comunali, est postu in mesu de su programma de collabboratzioni cun is capucinus, incarrerau cun s’ abertura de su Museu Etnogràficu insoru”.

Pùblicada su 18/09/2024

Titolo

Testo articolo in italiano

Pubblicato il 18/09/2024