20/09/2024

Santu ‘Èngiu. “SportCity Day 2024”

Santu 'Èngiu. “SportCity Day 2024”

Noba pigada de su giassu:www.sangavinomonreale.net In Santu 'Èngiu, cenàbara 20 de Cabudanni, h. 18:00 in su Campu Isportivu Santa Luxia, ddoi at po sa primu borta “PIGIAMA RUN” un'acontéssiu benéficu chi at organizau sa LILT (Lega Italiana po sa Lota contras a is Tumoris), chi si fait dónnia annu in is medas tzitadis italianas. Est una cursa/camminada non cumpetitiva innui is partitzipantis funt cumbidaus a si ponni su pigiama, símbolu de bonucoru faci a is pipius malàidus de tumori, chi fatuvatu passant tempus meda in s'ispidali in pigiama. Su grandu motori organizativu in Santu 'Èngiu, ancora una borta, est istétia Giusy Atzori, Presidente de s'assótziu “Insieme si può APS”, chi de annus si ócupat de preventzioni e sensibbilizatzioni faci a is maladias oncológicas. “Cumenti no espressai bonucoru po is pipius malàidus de tumori? Po custu – si contat Giusy – apu pediu a sa LILT de podi èssiri a su costau insoru in su “Pigiama Run”, cursa /camminada istórica non cumpetitiva, po agiudai is progetus e is programmas insoru destinaus a is pipius malàidus de tumori e a is famíllias insoru. Cun grandu prexu apu tentu s'onori de organizai cumenti a sea istacada de Casteddu innòi in Santu 'Èngiu, duncas su 20 de Cabudanni 2024, nosu puru calaus totus impari in pigiama in istrada”. Sa LILT arritzit totus is donatzionis po médiu de s'acàpiu:https://www.pigiamarun.it/cagliari innui tocat a s'iscriri. S'atóbiu benidori cun “Insieme si può” est su 6 de Meseladàmini cun sa “Camminata Rosa” po sa sensibbilizatzioni e sa preventzioni de su tumori a is titas. “Ocannu sa "Camminata" est arrica de medas acontéssius – ispricat Giusy Atzori – nci apu postu s'ànima e su coru e seus segurus chi totu custu impénniu portat arresurtaus. Non potzu, curri, camminai cumenti a una borta, ma sa conca est unu vulcanu de bideas e fintzas a candu apu a podi, apu a donai su màssimu po chini cumenti a mei gherrat e at gherrau e puru po chini, oi, non est prus cun nosu”.

Pùblicada su 20/09/2024