20/09/2024

Santu ‘Èngiu. Torrat sa Festa de Santa Teresa. 27 de Cabudanni 2024

Santu 'Èngiu. Torrat sa Festa de Santa Teresa. 27 de Cabudanni 2024

Noba pigada de su giassu: www.samgavinomonreale.net Ocannu puru Santu 'Èngiu si preparat a tzelebrai sa Festa de Santa Teresa, un'atóbiu chi sa comunidadi locali abetat cun entusiasmu. Mancai is arrisorsas limitadas, su Comitau organizativu, ghiau ocannu de sa Presidente Rinella Secci, at trabballau a forti po garantiri sa cumpridura de sa festa, puntendi no isceti a is afestus arreligiosus ma puru a suba de momentus de cumpartzidura e de ispàssiu. Sa Presidenti ponit in luxi s'importu de sa festa cumenti a ocasioni de atóbiu e bonucoru: “Disigiaus bivi impari momentus praxilis, una festa arreligiosa est unu momentu de cumpartzidura in sa preghiera e in s'ispréviu, est sa festa de una comunidadi intrea”. Su chi bessit a pillu cun fortza de is fueddus de su Comitau est sa voluntadi de no iscarésci is personas prus débbilis: su guadàngiu de sa Fiera de su Durci e de sa pisca de benefitzéntzia est destinau a is abbisóngius de sa Parróchia e a is personas abbisongiósas, sinnu cuncretu de s'impénniu sotziali de sa festa. Su programma chi incumentzat cenàbara 27 de Cabudanni, previdit una série de acontéssius siat arreligiosus chi de istentu. Sa serada de abertura previdit sa cena de benefitzéntzia traditzionali e su giogu ispassiosu “Dottor Why” condúsiu de luca Carcassi. Sa Festa sighit cun ispetàculus musicalis chi bint protagonistas, intra de is àterus, Sandro Murru Dj, Claudia Aru cun su grupu suu e Beppe Dettori. Sa dí prus importanti de is afestus arreligiosus est martis 1° de Meseladàmini, dí dedicada a “Santa Teresa di Gesù Bambino” , cun sa tzelebratzioni de sa Missa e sa prutzessioni in onori de sa Santa cun s'acumpangiamentu de sa Cunfraria, de sa Banda musicali “Città di San Gavino”, de is sonadoris de launeddas e de is cumpangias localis traditzionalis. Agoa, s'assótziu Fainas Antigas baddat su baddu campidanesu, sighit s'ispetàculu musicali de Damiano e Gabriel e po acabbai, in pratza, ddoi est sa bogadura de is billetus de sa loteria. Un'arringratziamentu ispetziali andat a Don Elvio, predi de Santu 'Èngiu, “chi ghiat sa comunidadi nosta cun afetu e chi est po nosu agiudu, ghia e puntu de arrelatu”. Sa Presidenti a s'acabbu at arringratziau totus is chi, cun impénniu e generosidadi, permitint chi custa traditzioni de importu sigat a bivi: “ In fundu est gràtzias a su trabballu e a sa generosidadi de is personas chi is traditzionis cosa nosta sighint a bivi”. Acabbendi cun un'augúriu po su benidori, su Comitau at espressau s'ispera chi sa Festa de Santa Teresa potzat sighiri a èssiri unu momentu de unidadi e cumpartzidura po totu sa comunidadi: Gràtzias a totus e Àterus Annus”.

Pùblicada su 20/09/2024