21/09/2024

Biddanoa de Forru. Su carru de Nannai ndi calat a Pinn’e Maiolu

Biddanoa de Forru. Su carru de Nannai ndi calat a Pinn’e Maiolu

Su sítiu de Pinn’e Maiolu, chi est a palas de su Museu Archeológicu, est una biddixedda de orígini nuraxesa chi s’agatat oruidda de Biddanoa de Forru, chi fortzis est própiu su logu de innui s’est spainada agoa sa bidda. Est unu logu ispantosu, ancora totu de iscoberri e de cumprendi, innui nascint mitus e contus de su logu alliongiaus a is mortus (de ingunis difati partiat su Carru Cóciu), a Luxia Arrabiosa, a Sa Musca Macedda, e àterus, innui iscavus recentis ant bogau a pillu òperas de canalizatzioni de s’àcua alliongiaus a sa cultura nuraxesa. “Su carru de Nannai” est unu labboratóriu esperientziali/sensoriali, chi ddu fait unu folklorista cantastórias (Agostino Piano) e unu musicista contadori (Paolo Sanna), chi ant a pigai sa manu a is partetzipantis po ddis fai (ri) iscoberri su ladu prus misteriosu de su pianeta nostu: s’ària (sa creatzioni de s’ómini avenit gràtzias a un’àlidu sulau in is prummonis suus, sa vida spàciat sulendi s’úrtimu àlidu) e a s’acostamentu chi una (o prus) cultura traditzionali at tentu cunfrontu de issu. Is partetzipantis s’ant a agatai “imboddicaus” in mesu a contus, mitus, bruscerias, usus e costumus a una parti, e is sonus modulaus de un’arregorta de ordíngius sonorus, ainas sciamànicas e istrumentus musicalis de culturas traditzionalis (africanus, asiàticus, sudamericanus, sardus… chi at a sonai su musicista isperimentali Paolo Sanna) a s’àtera parti. • su bentu moi moi • su carru de Nannai • su bólidu de is cogas • is pillonis chi si scóviant su benidori e àteras cosas puru. Est unu labboratóriu pràticu/teóricu (is partetzipantis s’ant a incorai a realizai/imparai unas cantu pràticas de sa traditzioni nosta) pentzau po fai bivi a is partetzipantis un’idea noa chi pertocat a custu elementu chi sa modernidadi est fadendi arrui che a elementu de pagu fundóriu. Su labboratóriu si fait in Biddanoa de Forru in su tretu chi est ananti de su sítiu Archeológicu de Pinn’e Maiolu, sàbudu su 28 de Cabudanni de is 5 a is 6 e mesu de a merí (h. 17.00-18,30) e costat 15 éurus a persona (s’acontèssiu si fait chi si sódigat su númeru mínimu de 20 personas) A is 4 de a merí (h. 16.00) si podit abbisitai s’àrea archeológica de Pinn’e Maiolu, paghendi 3 éurus a persona. Is prenotatzionis si pigant fintzas a gióbia 26 de Cabudanni. Po informus e prenotatzionis tocat a tzerriai a su 333 1760216 (whatsapp puru) [immàgini de copertina: https://albero-huluppu.blogspot.com/]

Pùblicada su 21/09/2024