26/09/2024

Lunamatrona. Iscusorxus de Marmilla: su 28 e 29 de Cabudanni abbisitas a indonu a is sítius archeológicus Sa Tumba de is Gigantis, Cuaddu de Nixias, Nuraxi Pitzu Cummu e a su Museu Sa Corona Arrúbia.

  • Home
  • nobas lunamatrona
  • nobas de su territóriu
  • Lunamatrona. Iscusorxus de Marmilla: su 28 e 29 de Cabudanni abbisitas a indonu a is sítius archeológicus Sa Tumba de is Gigantis, Cuaddu de Nixias, Nuraxi Pitzu Cummu e a su Museu Sa Corona Arrúbia.

Lunamatrona. Iscusorxus de Marmilla: su 28 e 29 de Cabudanni abbisitas a indonu a is sítius archeológicus Sa Tumba de is Gigantis, Cuaddu de Nixias, Nuraxi Pitzu Cummu e a su Museu Sa Corona Arrúbia.

Noba pigada de su giassu:www.sangavinomonreale.net Sàbudu 28 e domínigu 29 de Cabudanni in Itàlia si afestat sa prus importanti manifestatzioni culturali d'Europa: is GEP- Giornadas Europeas de su Patrimóniu (European Heritage Days). Su tema italianu de is "GEP" 2024 est "Patromóniu in camminu" e torrat a pigai su "slogan" europeu “Routes, Networks and Connections", chi at iscioberau su Cuntzillu d'Europa e chi ant cumpartziu is Paisus chi ant acunsentiu a sa manifestatzioni. Est unu cumbidu a arrexonai a suba de su valori de su patrimóniu culturali in arrelatu a camminus, bias de communicatzioni e arretzas chi, oi o in passau, ant permítiu arrelatas e cuncàmbias intra de is pópulus e is culturas e ant cuntribbuiu a sa formatzioni de s'identidadi nosta. Su Cunsórtziu Turísticu Sa Corona Arrúbia est sémpiri impenniau in s'avaloramentu de is benis materialis e immaterialis de su territóriu. Prummovit, difatis, s'ispartzinadura e sa connoscéntzia de is traditzionis localis e sa collabboratzioni in sa prummotzioni de su cuntzetu de identidadi culturali. Po médiu de s'organizatzioni de acontéssius e manifestatzionis, favoressit s'atóbiu de realidadis culturalis diferentis chi diaici tenint sa possibbilidadi de cumpartziri connoscéntzias, pràtigas culturalis e artísticas, ma puru atividadis cummertzialis e abbilidadis artigianalis. S'energia cumpartzida intra de custus sugetus, chi ndi benint de cuntestus culturalis diferentis ma cun caraterísticas únicas, portat a solutzionis innovativas e creatividadi chentza de paris. In ocasioni de s'acontéssiu si proponit a indonu un'abbisita ghiada a su Museu Naturalísticu de su Territóriu "Giovanni Pusceddu" e a duus sítius archeológicus importantis: Sa Tumba de is Gigantis Su Cuaddu de Nixias (Lunamatrona) e su Nuraxi Pitzu Cummu (Lunamatrona). Po partitzipai tocat a si prenotai a intru de su 26 de Cabudanni. Is chi non partitzipant a s'abbisita a is sítius archeológicus podit abbisitai aici etotu a indonu is colletzionis permanentis de su Museu. Maneras de partitzipatzioni: sàbudu 28 de Cabudanni e domínigu 29 de Cabudanni

● un'abbisita ghiada a mengianu: h. 10:00, durada prus o mancu h. 2, 30 ( duas oras e mesu)

● un'abbisita ghiada a merí: h. 15:00 , durada prus o mancu h. 2,30 (duas oras e mesu)

● logu de atóbiu e de parténtzia: Museu Naturalísticu de su Territóriu "Giovanni Pusceddu"

● númunu màssimu de partitzipantis:20

● trasportu: donniunu provit de sei

● Sa partitzipatzioni est a indonu.

● Oràriu de abertura de su Museu: h. 09:00 – 19:00 (de is noioras de a mengianu a is seti de a merí de sighiu).

Pùblicada su 26/09/2024