Gùspini: Presentada de su líbburu "Seddas Modditzis - Memorie lontane"
Gùspini: Presentada de su líbburu "Seddas Modditzis - Memorie lontane"
Cenàbara su 14 de Friaxu 2025 in is localis de sa biblioteca Comunali “Sergio Atzeni” de Gùspini, a is 5 de a merí (h. 17.00) ddoi at sa presentada de su líbburu de Annalisa Uccella intitulau "Seddas Modditzis - Memorie lontane".
S’autora, in su líbburu suu, si contat s’istória de sa biddixedda minerària Asproni, chi oi ancora s’ammostat is fàbbricus suus intra is territórius de Igrèsias e Gonnesa, mancai siat giai de meda chi sa miniera de Seddas Modditzis, alliongiada a sa biddixedda, apat acabbau s’atividadi de bogadura sua.
In su contu si ammesturant fatus istóricus e contus personalis cumintzendi de sa biddixedda e de sa persona de Giorgio Asproni chi, in s’acabbu de s’Otuxentus, iat comporau un’atzioni de sa Miniera "Is Seddas Modditzis" a su costu importanti de 1500 francus, pustis chi iat dirígiu dexi annus sa Miniera de Montibéciu, esperiéntzia chi dd’at lassau in totu sa vida un’arregodu bellu.
Su contu donat a is letoris unu ritratu de un’imprendidori bisadori, chi at tentu in grandu contu s’esperiéntzia sua in Montibéciu fata innantis, e chi non dd’ammancàt una sensibbilidadi manna cunfrontu a is cunditzionis de trabballu de is minardoris, chi in is tempus suus non fiant fàtzilis. Sa fraigadura de domus de rispetu, iscolas e ispàtzius comunus si ammostant sa manera de fai sua, chi non punnàt iscéti a su guadàngiu, ma boliat fintzas a ponni peis a is relatzionis sotzialis in unu logu inimigu innui a binci fiant is diferéntzias intra is arrolus diversus in sa miniera, cun su pesu de su trabballu in is palas de is prus pòburus. Un’idea bisadora de progressu industriali chi si arrogat candu atumbat cun sa vida de su trabballu in galleria.
S’istrutura narradora est pratzia in cuatru partis simbólicas – Istadi, Atóngiu, Ierru e Beranu – chi ammostant su passai de su tempus e faint a cumprendi metaforicamenti s’idea tzíclica de su destinu de sa biddixedda: nàscida, isvilupu, decadéntzia e rinàscida.
Moderat sa presentada s’iscritora Iride Peis chi contat a sa própia manera is acontéssius de su burgu mineràriu de Montibéciu chi issa est meda afetzionada
S’autora
Annalisa Uccella s’est laureada in Isciéntzias Políticas – Indiritzu Istóricu Políticu Internatzionali in s’Universidadi de is Istúdius de Casteddu. Pustis de unus cantu Master Internatzionalis s’est ispecializada in Diritu, Política e Economia de is Comunidadis Europeas in su Collègiu Europeu de Parma. De su 1993 a su 1997 est funtzionària esperta de políticas comunitàrias in Confindustria – Federatzioni de is Industrialis de sa Sardigna, e de su 1998 tenit s’incàrrigu de Diretori de su Consórtziu po sa Tutela de su casu “Pecorino Sardo DOP”. Est interessada meda a s’istória e a is baloris identitàrius de sa terra sua, de su 2020 est trabballendi in su progetu de cuberu e ricualífica de sa Biddixedda Minerària Asproni.