Gùspini: Notas e Fueddus

S’assótziu Off Key fait isciri chi est nàsciu su coru nou de boxis biancas "Le mille e una nota" e cumbidat a totus a partetzipai a sa primu esibbitzioni sua sàbudu su 22 de Friaxu a is 6 de a merí (h. 18.00) in s’aposentu de su Consillu de su Comunu de Gùspini.

In ocasioni de sa prima borta insoru in púbblicu s’acontéssiu at a essi speciali, un’ammesturu de Música e Contus chi portant a pentzai a paesàgius, boxis e sonus, cumenti a una maxia.

Istràngiu ispeciali de su merí est su "Principero", su primu contu po pipius chi at pubblicau Martina Liscia, guspinesa, laureada in linguas, giornalismu e comunicatzioni multimediali e grandu bisadora, chi at a acumpangiai sa serada cumenti a unu filu ghia.

Ciaciarrat cun s’autora Iride Peis, maista istimada e iscritora guspinesa.

Serrat s’acontéssiu su coru Off Key cun branus ispiraus a is paristórias.