Gùspini: Carnevalinas 2025: Gùspini in mesu de is iscenas cun una direta televisiva natzionali

Su Campidanu de Mesu est preparendi-sí a bivi su Carnovali, ma ocannu de importu mannu est cussu de Gùspini. Su Carnevalinas, lómpiu a sa de 33 editzionis, no at a essi iscéti un’esplosioni de coloris, arti e traditzioni, ma fintzas un’acontéssiu mediàticu: s’isfilada de sàbudu s’8 de Martzu difati dd’at a trasmiti in direta televisiva Videolina in su Canali 10 de su digitali terrestri e in su Canali 819 de su satélliti, portendi sa maxia de su Carnovali guspinesu in is domus de milla ispetadoris.

Insuteris in is comunus acanta, cumenti a Samassi, Marrùbiu e Santu ‘Èngiu, funt preparendi totu po su carnovali insoru, Gùspini si nci istésiast po sa grandesa de un’acontéssiu chi si mudat in unu ispetàculu po unu pùbblicu prus mannu. Su merescimentu est de s’amministratzioni e de sa Pro Loco, chi ant trabballau po chi su Carnevalinas non fessit iscéti una manifestatzioni locali, ma su logu de riferimentu de totu su territóriu. “Boleus fai connosci a unu púbblicu prus mannu sa bellesa e sa traditzioni de su Carnovali nostu”, at ispiegau Giuseppe De Fanti, síndigu de Gùspini, ponendi in craru s’importu de cumparri in sa trasmissioni televisiva cumenti a una imbidriera po s’arti de fai is carrus e po sa cultura de su logu. Po Gùspini, su Carnevalinas no est iscéti una festa, ma unu símbulu de identidadi culturali e de atràida turística. Cuaus ancora, is carristas funt acabbendi is óperas monumentalis insoru, e peri bias is bichibbocus faint esercítziu po aberri sa manifestatzioni.

Duncas s’apuntamentu est fissau a s’8 de Martzu: Gùspini at a essi sa capitali de su Carnovali sardu, cun is màscaras suas, is carrus ispantosus suus e una direta televisiva chi at a fai de su Carnevalinas s’acontéssiu prus sighiu de totu su terrirtóriu.