Gùspini: S’eréntzia de is fémminas de Domu Lussu - Reading
Sardu
Italiano
Su 22 de Martzu 2025 s’Auser Guspini OdV in sa sea de bia Togliatti 1 a is 5 e mesu de a merí (h. 17,30) organizat su reading cun sa cantautora CLAUDIA CRABUZZA e s’atora e organetista DILVA FODDAI.
Su testu, chi at scritu Claudia Crabuzza “L’EREDITA’ DELLE DONNE DI CASA LUSSU” (Joyce Lussu e Giovanna Serri) est su resultau de sa tesi de Laurea magistrali chi s’autora Claudia Crabuzza at dibbàtiu in s’Universidadi de Tàtari e bolit bogai a pillu sa relata intra Joyce Lussu e Giovanna Serri, sa prima ativista e intelletuali, mulleri de Emilio Lussu, s’àtera messaja e tessidora chi at sighiu po cincuant’annus sa domu e is terras de sa famíllia Lussu.
Impari cun issus s’iscoberrit su patrimóniu culturali e istóricu de sa bidda de Armùngia innui ant bíviu, ma prus de totu s’ópera bolit essi un’ocasioni po fai cumprendi ancora chi s’istória est de is fémminas puru.
S’antifascismu, sa resisténtzia e sa cumbata po sa mancebatzioni femminina de sa Istória “manna” s’intessint in una trama única cun is istórias mínimas de logus privaus, labboratórius, coxinas, chi funt bius cumenti a cosas de pagu contu in mesu de su contu ufitziali. Invécias sa poesia, mancai in is tempus de trabballu meda, de semíngiu, de arregorta e in cussus de cumbata, acumpàngiat e sustenit is esisténtzias, cun sa passiéntzia de is tziclus naturalis, cun sa fortza de is connosciéntzias popolaris e cun s’ispera, fraighendi tessíngius chi incluint e sanant, a amparu de istruturas sotzialis innui dónnia comunidadi umana si fundat.
Interis de sa presentatzioni Claudia e Dilva ant a sonai tres cantzonis originalis chi at cumpostu Claudia Crabuzza movendi de is tres testus poéticus de Nazim Hilkmet, Agostino Neto (toteduus in sa tradutzioni de Joyce Lussu) e de Orlanda Sassu e Efisio Sanna, duus poetas originàrius de Gùspini, chi de issus s’est chistionau in un’àtera initziativa.
A s’initziativa, chi córdinat sa presidenti Auser Carmen Marongiu, intervenit s’assessora a sa cultura de su comunu de Gùspini Francesca Tuveri.