Biddanoa de Forru: Ammosta de Arti Colletiva in ocasioni de sa Festa de is Mammas

Est intitulada “Sa Mamma, Sa Terra, Sa Diosa La Madre. De is orìginis a oi intra creatzioni, fertilidadi e autodeterminatzioni” s’ammosta de Arti Colletiva a incuru de Alessandra Sorcinelli chi at apariciau su Parcu e Museu Genna Maria in ocasioni de sa Festa de is Mammas.

Est un’ammostu de pinturas, iscurpiduras e fotografias chi si incìngiat cenàbara su 9 de Maju 2025, a is 6 de a merì (h. 18.00) in sa Sala Ammostas Temporàneas de su Museu Genna Maria. S’at a podi abbisitai a indonu dònnia dì (foras de su lunis) fintzas a su 31 de Maju 2025 de is 9 oras e mesu a sa una a mengianu e de is 3 e mesu a is 7 a merì (9:30 - 13:00 e 15:30 - 19:00)

Po informatzionis: 070/9300050

Fémmina mamma chi donat sa vida.

Sa figura femminina est in mesu de sa vida e de totu su tziclu cosa sua. Diosa, Atitadora, Acabbadora.

Su matriarcau sardu mìticu cun is derivatzionis suas oi est biu ancora in unu mundu chi càmbiat a lestru portendi sa Fémmina a essi prus lìbbera e non subordinada a s’òmini.

Autodeterminatzioni femminina, una manera noa chi isciopat impidosa ma chi fait fatiga a fai arréxinis in is aneddus strintus de sa sotziedadi intra costumàntzias e modas noas.

S’ammosta colletiva a una boxi sola truessat custus acontéssius cumplessus contendisì custa realidadi cun immàginis, coloirs, sinnus e formas.

Si ponint in giogu artistas mascus e artistas fémminas alliongiaus de su spìritu e de s’abbisòngiu de afirmai e cumpratziri s’abbisòngiu urgenti chi non podit abetai prus de ponni in craru arrolus e figuras in una sotziedadi chi a bortas si ndi scarescit de ammostai sa diversidadi cumenti a fundamentu de sa vida etotu.