Gùspini: Su Camminu de is Cerridoras

S’Assótziu XconoscereXfare cun su patrotzíniu de su Comunu de Gùspini, in collabboratzioni cun s’Assótziu “Sa Mena” e sa Filodrammàtica Guspinesa, organizat “Su Camminu de is Cerridoras”, de Montibéciu faci a su Cantieri Azuni, dedicau a sa memória de is 11 fémminas e pipias chi si funt mortas in sa disgràtzia de su 4 Maju 1871.

Domìnigu su 4 de Maju 2025 s’atóbiu est a is 4 e mesu de a merí (16.30) in su Pratzali Rolandi e a sa lómpida a su Cantieri Azuni ddoi ant a essi momentus de música cun Angelo Pitzalis e su sonetu suu e sa Filodrammàtica Guspinesa.

Agoa, a is 7 de a merí (19.00) in is localis de s’Ex Mensa Impiegaus de su Pratzali Rolandi si fait sa projetzioni de unu filmau a incuru de s’Assòtziu “Sa Mena”.