Guspini: Presentada de su libburu “Alba a Montevecchio” de Sandro Renato Garau

In ocasioni de sa de 15 editzionis de su “Maju de is lìbburus”, su Comunu in collabboratzioni cun su “Tzentru po su lìbburu e sa Letura”, stràngiat sa presentada de su romanzu “Alba a Montevecchio” de Sandro Renato Garau, imprentau de “Il Pettirosso”. S’apuntamentu est custu merì, cenàbara su 20 de Làmpadas 2025 a is 6 (h. 18.00) in sa sala stòrica de su Consillu de su Comunu, in bia Don Minzoni 10. A arrexonai cun s’autori est s’assessora a sa Cultura Francesca Tuveri chi at a moderai s’atòbiu.

Su lìbburu contat, cumenti chi fessit unu romanzu, is acontéssius chi in sa metadi de s’Otuxentus ant interessau is comunidadis de Nasturzio e Albis, in su sartu de Gùspini, chi in cussus annus fiant po intrai in su giru de s’indùstria moderna de bogadura minerària. Su romanzu est arricau cun is mitzas uficialis chi ndi contant is acontéssius. S’autori Sandro Renato Garau, a sa de tres pubblicatzionis suas cun sa domu de imprenta Pettirosso, est apegau a s’àrea de Montibéciu, giai chi ndi scriit sempri a bortas a manera crara e a bortas prus cuada, cumenti at fatu cun "Juan@Rosada": unu romanzu epistolari chi ammesturat traditzioni e arregodus, cun una filera de e-mail chi ponint impari sa modernidadi de su médiu e tempus non tropu antigus epuru acontéssius de diora, de sa stòria nosta.

S’initziativa fait parti de su tziclu de acontéssius “Intelleg(g)O…”, dedicaus a sa promotzioni de sa letura e de su consideru po mori de sa literadura contemporànea.