Pabillonis: Atòbiu de Meseargiolas cun is ajajas e is ajajus de sa “Residenza San Giovanni”

Custu mengianu un’àteru atòbiu, su de Meseargiolas, cun is ajajas e is ajajus de sa “Residenza San Giovanni” de Pabillonis, realizau aintru de su progetu "Legger...mente Insieme" a incuru de Agorà Cooperativa po su Sistema Bibliotecàriu Monte Linas in collabboratzioni cun s’Ufítziu Língua Sarda de Pabillonis. Is beciteddus de s’ospìtziu funt sempri prexaus candu andaus a ddus agatai e s’arregodant de candu seus chentza de si biri.

Custa borta puru s’operadora de su Sportellu de Lìngua Sarda ddus at fatus arriri ligendiddis duus contixeddus spassiosus e agoa totus cuncentraus ca depiant giogai… e chini dd’at detzidiu chi depeus abetai is festas de Meseidas po sa tòmbola? Ddi fait cuddu “Paschixedda candu arribbat, arribbat!”

E duncas caramellas po is ambus, is ternas, is cuaternas e is cincuinas e a scioberu unu portacrais o una pinna de su Sistema po sa tòmbola.

Gei si funt spreviaus oi puru!

Immoi a si torrai a biri a pustis de su pàsiu istadiali, a mitadi de Cabudanni.