13/09/2024

Gùspini. de su 14 a du 16 de Cabudanni sa comunidadi afestat a Sant’Isidoru.

Gùspini. de su 14 a du 16 de Cabudanni sa comunidadi afestat a Sant’Isidoru.

Noba pigada de sa “Gazzetta del Medio Campidano” Sa comunidadi guspinesa est pronta po afestai a Sant’Isidoru, patronu de is birrociajus (carreteris) de is messajus, de is sartus e de is incúngias. S’istória si contat chi Sant’Isidoru est nàsciu in Ispagna in su 1080 e s’est mortu in su 1130. In su 1622 dd’at canonizau Gregóriu XV. Is relíchias suas s’agatant in sa crésia de Sant’Andria in Madrid. S’alabadura po Sant’Isidoru cumintzat in Sardigna cun su domíniu cadelanu/ispagnolu chi at portau su cultu de santus meda de orígini ibérica. Is guspineus ant sémpiri alabau meda custu santu messaju e a ddu cunfirmai est puru sa crésia dedicada a issu chi ant pesau in su 1982 in sa bia po Arcidanu. «In medas fiant abetendi chi sa festa si torressit a fai e immoi est possíbbili gràtzias a is interventus de restàuru fatus in sa crésia e in is terras a ingíriu. Oi s’istrutura aparit prus bella, acollidora e funtzionali po istrangiai genti meda chi s’agatat in ocasioni de sa festa e in àteras ocasionis de atóbius comunitàrius. Su trabballu dd’ant fatu cun gana bella volontàrius, coordinaus e ghiaus de sa Cunfraria “Madonna del Rosario”. Tziu Casu nci at postu meda de su suu», at nau don Nico Massa, su predi de Santu Nicolau. «Sa festa de Sant’Isidoru arrespundit a sa sensibbilidadi e a sa cultura de is guspinesus, afungada in s’economia e in sa cultura de su sartu. S’iat a bolli andai faci a su pópulu guspinesu, prus de totu cussa parti chi at afrontau sa crisi de su setori e at sighiu a trabballai po abarrai ativus in su territóriu. A su patrimóniu suu apartenit un’ispiritualidadi forti chi si espressat cun recatamentu, ma est a dónnia manera ispainada. Sa festa iat a bolli essi puru un’incoramentu po chi custa richesa ideali ndi artzit prus a pillu e agatit àteras maneras po allutai sa vida comunitària de sa cristianidadi e de sa sotziedadi de su logu», aciungit don Nico. «Deu ia a bolli incorai e cumbidai totu sa comunidadi guspinesa a partetzipai cun grandu festa, chi espressit ispiritualidadi e alabamentu impari a su prexeri de s’agatai impari in amigàntzia in is afestamentus tzivilis», est custu su cumbidu e s’ispera de su predi de Santu Nicolau. Programma de is afestamentus religiosus e tzivilis organizaus de sa Cunfraria “Madonna del Rosario” cun s’amparu de su Comunu, Regioni Sardigna e Assótziu Entis Localis po is Atividadis e de Ispetàculu, cun sa collabboratzioni de sa Pro Loco. Sàbudu su 14 de Cabudanni: a is 10.00 de a mengianu sa prutzessioni cun su bultu partit de sa crésia de Santu Nicolau faci a sa crésia in su sartu de Sant’Isidoru, acumpangiada de sa cunfraria, grupus folklorísticus e tratoris paraus a festa. Sa prutzessioni passat in bia Gramsci e de su distribbudori Q8 si sighit a màchina fintzas a sa crésia de su Santu. A is 8 de noti (h. 20.00) si fait sa cena comunitària cun sa collabboratzioni de is Ex allievas salesianas. A is 10 de noti (h. 22.00) si fait s’artefítziu e agoa “Viaggio attraverso la musica”. Domínigu su 15 de Cabudanni: a is 11.00 sa Missa Manna cun Don Nico Massa. A is 5 de a merí (h. 17.00) ispetàculu musicali. A is 6 de a merí (h. 18.00) “Sagra della vitella”. Lunis su 16 de Cabudanni a is 10.00 si serrat sa crésia a su cultu e su bultu ndi torrat chentza de fai prutzessioni.

Pùblicada su 13/09/2024