Guspini. Le sfide delle donne – Rita Levi Montalcini

S’Assótziu XConoscereXFare, cun su patrotzíniu de su Comunu de Gùspini e in collabboratzioni cun sa Biblioteca Comunali Sergio Atzeni” organizat, sàbudu su 14 de Cabudanni a is 6 de a merí (oras 18.00) in sa Biblioteca, un’acontéssiu po arregodai a Rita Levi Montalcini. In cust’ocasioni est presenti sa neta de Rita Levi Montalcini. Piera, sa persona chi prus de totus nd’at allogau su patrimóniu ideali e simbólicu, sa cabufila de cuss’arretza de iscolas e istitudus chi in su nómini de sa tzia isvilupat unu programma de educatzioni po is gióvunus e sa circa. Sa tarea de Piera est simpli meda: “Non bollu lassai morri un’esémpiu”. In un’intervista a Ugei at nau: “Non seu gelosa de tzia Rita, giai chi seu diversa de issa. Deu apu fatu is cosas chi mi praxiant e issa at fatu is cosas chi praxiant a issa”. S’assótziu cumbidat is tzitadinus de dónnia edadi e prus de totu is gióvunus, cun una fràsia nodia de Rita Levi Montalcini, dedicada própiu a is generatzionis de su benidori. "Naru a is gióvunus: non pentzeis scéti a bosàterus, pentzais a is àterus. Pentzai a su benidori chi si abetat, pentzai a su chi podeis fai e non timeis nudda. Non timeis is barrancus: deu nd’apu passau de dónnia colori e apu bíviu chentza de timoria, indiferenti a sa persona mia." Custa initziativa est sa segunda de una filera stichia in unu progetu prus articulau intitulau “Ritratti. Le sfide delle donne”, chi previdit unas cantu biografias de fémminas chi si funt ammostadas gràtzias a su modu insoru de pentzai, de cumportamentu, de impresas chi ant fatu, de idealis, andendi contras a is arrégulas donadas de sa sotziedadi e de su tempus chi ant bíviu. Po donniuna de custas fémminas s’at a proponni una genia de ritratu-biografia, imperendi circas fatas in is líbburus, pubblicatzionis e cun s’agiudu de immàginis e vídeus pigaus de su web. Custus atóbius s’ant a fai de tanti in tanti e is datas chi benint s’ant a fai isciri.

Pùblicada su 13/09/2024

Titolo

Testo articolo in italiano

Pubblicato il 13/09/2024