Gùspini: Presentada de su líbburu “Oltre”
Gùspini: Presentada de su líbburu “Oltre”
Cenàbara su 21 de Friaxu a is 5 e mesu de a merí (h.17.30), sa Biblioteca Comunali “Sergio Atzeni” de Gùspini at a istrangiai cun prexeri sa presentada de su líbburu intitulau "Oltre", un'òpera chi ponit impari un’annu de trabballu de is presoneras de sa setzioni femminina de sa “Casa Circondariale “Ettore Scalas” de Casteddu-Uda. Est nàsciu che a una iscummissa de cincu personas cun su disígiu de cumpratziri, gràtzias a unu cursu de iscritura creativa e disegnu, s’esperiéntzia de sa pérdida de libbertadi chi funt bivendi fémminas disconnotas cun totus is problemas personalis, de famíllia e de adatamentu insoru, aintru de unu sistema innui dónnia acinnu e cosa fata est de importu mannu.
In custu líbburu non s’agatant is sólitus contixeddus prevedíbbilis de cumenti est sa vida in presoni. Custa est un’arregorta ispetziali de pentzamentus, bisus, isperas e illusionis de fémminas. Fémminas cun is ogus chi non sèmpiri funt prenus de làgrimas. Personas chi a su chi ant bíviu aciungint unu pagheddu de inventiva chi ddas fait infinias, atesu de is istereótipus, chi arrennescint a si ligi e a ligi su mundu a giru de issas chentza de timoria. E aintrus de dónnia istória ddoi funt is istórias nostas personalis. A palas de dónnia isteddu una luxixedda de una làntia chi bolit abbruxai chentza de abbisóngiu de s’agiudu de nisciunus. Fémminas ispetzialis chi in presoni perdint cunsisténtzia. Fémminas chi funt abetendi una vida noa e bera.