Biddanoa de Forru: Is tésseras noas po is úndixi annus de is Amigus de Santu Antiogu.

Funt disponíbbilis is tésseras 2025 po is chi bolint essi sótzius de su cumitau “Santu Antiogu Bèciu”. In arregalu ocannu sa mapa de su patrimóniu archeológicu de su territóriu de Seddori innui ddoi funt sinnalaus totus is sítius, de su prenuràgicu a s’edadi romana, e sa mapa turística de su territóriu de Biddanoa de Forru: totus is resursas de unu territóriu chi agiudant a avalorai sa Marmidda. In custus annus s’àrea de sa cresiedda in su sartu est diventada unu símbulu de cumenti sa partetzipatzioni de sa genti potzat fai cosa de importu po totus.

Su Comitau, promóviu de is Proloco de Seddori e Biddanoa de Forru, tenit sa tenta de torrai a sa comunidadi sa cresiedda de su Sescentus de Santu Antiogu e s’àrea birdi a ingíriu. Unu progetu chi est nàsciu in su 2014 e oi ancora est biu e ativu.