Seddori. Giogus antigus: Bintunu.
Seddori. Giogus antigus: Bintunu.
Bintunu fiat unu giogu chi fadiant sceti is mascus in logus precisus de sa bidda. Pesànt a cuncordai una pista dereta o ramificada in sa terra sciusta chi potàt in una forada (sa fonnanna) innui si ammuntonànt is pallinas chi fiant su prèmiu siat po s’incarreru, siat de s’acabbu.S’ aina elìgia po custu giogu fiat sa pallina de imbìrdiu, o, sigumenti costànt meda, si cuncordànt in terra e ludu. Pustis candu iant incarrerau a bendi sa cosa de bufai gasada cun su tapu in imbìrdiu si circada de ddus arreguai. Custu tapu, difatis, parriat cumenti una sfera pitica de imbìrdiu de cabori birdi.
Su giogu prevediat unu prèmiu po s’incarreru, chi fiant is pallinas postas aintru de sa “fonnanna”.
Pustis de su lànciu de sa primu pallina, chi tocat a totus is giogadoris segundu unu turnu decìdiu a s’incarreru, si sighiat (segundu a cumenti fiat posta sa pallina a s’abertura de su canali) a “pitzollai” o “pistincai” (pitziai).
Chini pitzolada o pistincada depiat arrennesci a fai curri sa pallina cosa sua gràtzias a su stumbu cun s’àtera pallina, chi iant incarrerau a dda fai curri donendi-ddi unu corpu cun su didu mannu e s’indixi.
Su stumbu intra de is duas pallinas si narat “bicocai” e balliat tres puntus e si podiat arribai fintas a 21.
Su scopu de su giogu fiat cussu de arribai a “fonnana” chentza de fai bessiri is pallinas de su caminu sinnau. Chini nci arribàt cun sa pallina cosa sua binciàt totus is pallinas chi nci fiant in sa “fonnanna”.
Pùblicada su 29/07/25