Sàrdara. Sa Coja sardaresa
Sàrdara. Sa Coja sardaresa
In sa cida a innantis de sa coja si depiat potai “su beni” o “ammanitzu” de sa sposa in sa domu pesada de su sposu. S’ ammanitzu, is trastus e is pignus ddus poniant in pitzus de is carrus chi fiant arricaus cun is guturadas e is tapetus totus coloraus tèssius in su trebaxu. S’ acumpangiamentu, partendi de sa domu de sa sposa, sighiat in is bias de sa bidda e sa genti ddu castiàt totu spantada. Arribaus in sa domu noba is parentis poniant totus is cosas a postu po sa dì de sa coja.
Una pariga de diis a innantis de sa coja is duas famíllias s’ atobiant po preparai su pani e is durcis. In su tempus passau totu sa bidda partecipàt a sa coja. Ónnia famíllia chi partecipàt depiat portai o mandàt “su presenti” bolit nai s’arregallu po sa coja.
Su sposu, sa dì de sa coiantza, atobiàt in sa domu de sa sposa e issa impari a su babbu e a sa mamma dd’arriciant. Issu sighiat custu cerimoniali:
- Seu beniu po sa cummessioni, a ndi pigai sa sposa mia
- Sa sposa giai est pronta
- Intzaras deu ddi pigu sa manu po ddu saludai, arrecumendamì a Deus e perdoneimì chi dd’ apu fatu mancantzia.
Su babbu intregàt sa filla cun custus fueddus:
-Custa rosa chi ndi segu de su giardinu miu ti dda intregu po sposa. Tenidda cara cumenti dd’ apu tenta deu.
A sa bessida de sa crèsia is sposus beniant benedixus cun sa ghetadura de su trigu, de su sali e de su dinai, chi fiant “is arrónzius” auguralis.
Is sposus de Sàrdara papànt de su matessi pratu. Su pratu chi fadiant po sa coja fiat “sa cassola”.
Pustis de su pràngiu si fadiat festa baddendi e sonendi.
Apicau in unu muru de su Comunu de Sàrdara apu agatau unu documentu, chi a cantu parrit est de su 1866, innui is artículus (pigaus de su códixi civili de su Rennu d’ Italia de su 1865) de sa coja civili funt scritus in sardu.
Oi, cun sa Delibera de sa Giunta comunali n.150 04/08/2014 is citadinus podint dimandai s’ impreu de sa língua sarda in su ritu de celebratzioni de is cojas civilis cun sa ligidura de is tres articulus de su Códixi Civili (artt. 143, 144 e 147).
Pùblicada su 30/07/2025