Su Sistema Bibliotecàriu Monte Linas (Sistema Bibliotecario Monte Linas) fait sciri ca incumentzat sa de 22 editzionis de su cuncursu dedicau a piciocus e piciocas de sa scola primària e segundària de primu gradu: ocasioni po rifletti a pitzus de su ruolu de s'intelligèntzia artificiali in sa vida de d-ònnia dii.
Oi s'AI non fait sceti càrculus e non serbit sceti po giogai a scacus: sciit chistionai, fai màginis, cumprendit su linguàgiu e nos acumpàngiat aintru de is telefuneddus, in is veturas, videugiogus e po fintzas a scola.
Cummenti de d-ònnia aina perou s'AI sendi aici poderosa, nos podit agiudai meda ma tocat a dda manixai cun atentzioni, responsabbilidadi e spiritu crìticu. Podit ammellorai s'imparu, agiudai sa medicina, amparai sa terra… ma tocat a nosu a ddi imparai su chi est giustu o no.
In custa editzioni is studiantis ant a podi scapiai sa fantasia e imaginai su benidori: scolas cun robot-cumpàngius, domus intelligentis, citadis totu tecnològicas. Cummenti at a cambiai sa vida? Tocat a issus a ddu contai!
Su bandu interu est a disponimentu in is bibliotecas comunalis de su Sistema Monte Linas (Arbus, Gonnos, Gùspini, Pabillonis, Santu ‘Èngiu, Sàrdara e Biddacidru)
Scadèntzia: 31 de gennàrgiu 2026